Leta ya Tanzania yategetse Urusengero Christian Life gufunga imiryango, kubera Pasiteri Dominique Kashoix Dibwe warushinze utanga inyigisho zirimo gusaba abayoboke guhohotera cyangwa kwica abo bashinja ubupfumu, akanasaba buri muyoboke kwishyura amashilingi akoreshwa muri Tanzanina ibihumbi 500 (asaga ibihumbi 240 Frw).

Ikinyamakuru The Citizen cyatangaje ko ku wa 28 Nyakanga 2024, ibaruwa isaba urwo rusengero gufunga yatanzwe n’Urwego rwa Tanzania rushinzwe kubarura amasosiyete, kuko urwo rusengero rushinjwa gukora mu buryo buhabanye n’amategeko ndetse n’umuco bya Tanzania.

Pasiteri Dominique Dibwe wanahawe izina ry’akabyininiro rya ‘Kiboko ya Wachawi’ ku bwo kwiyita umunyembaraga zidasanzwe mu guhashya abarozi, urusengero rwe rufunzwe nyuma y’uko Tanzania ibonye ko inyigisho ze zagira uruhare mu gucamo ibice abaturage, ndetse zikaba zaba intandaro yo gukora ibyaha birimo n’ubwicanyi.

Ifungwa ry’Urusengero Christian Life ribaye nyuma y’inkuru yari yarakozwe na The Citizen, igaruka ku mazina ya bamwe mu banyamadini n’abavugabutumwa bakorera muri Tanzania, bari gukura akayabo k’amafaranga mu kwishyuza abo basengera ndetse bakabagurisha ibirimo amazi, umunyu, imyenda ndetse n’amavuta, babasezeranya ko birimo imbaraga zidasanzwe zabafasha no gukira indwara.