Umutoniwase Linda witabiriye irushanwa rya Miss Rwanda muri 2017 akambikwa ikamba ry’igisonga cya kabiri cya miss Rwanda 2017, yasezeranye imbere y’amategeko n’umukunzi we Apotre Daniel Ruhinda, umushumba w’itorero Church of Life Rwanda.

Aba bombi basezeranye kubana nk’umugore n’umugabo nk’uko amategeko y’u Rwanda abiteganya kuri uyu wa kane tariki 17 Kanama 2023, mu murenge wa Kagarama mu mujyi wa Kigali, bari bamaze imyaka itanu yose bari mu munyenga w’urukundo.

Uyu Umutoniwase Linda yagarutsweho cyane mu itangazamakuru ubwo yitabiraga irushanwa rya nyampinga akegukana ikamba ry’igisonga cya kabiri, icyo gihe Iradukunda Elsa wabaye umugore wa Ishimwe Dieudonne aka Prince kid mu mategeko wateguraga iryo rushanwa, ni we watwaye ikamba rya nyampinga 2017.

Dan Ruhinda ugiye kurushinga na Umutoniwase asanzwe ari umuyobozi w’itorero Church of Life Rwanda rikorera kuri Spot View Hotel muri Kicukiro, akaba n’umuvandimwe wa David Bayingana uri mu bashinzwe B&B FM-Umwezi. Afite impamyabumenyi y’icyiciro cya gatatu cya kaminuza ‘Masters’ muri Art and Theology.