Ikipe ya Inter Miami yo muri Leta Zunze Ubumwe za Amerika ikinamo abakinnyi bafite amazina akomeye barimo umunya-Argentine, Lionel Messi, Luis Suarez na Sergio Busquets yaraye itsinzwe n’ikipe ya Al-Hilal yo muri Saudi Arabia ibitego 4-3.

Ni umukino waranzwe no kurusha cyane kw’ikipe yari iwabo ya Al-Hilal isanzwe ikinamo rutahizamu Neymar Jr umaze igihe kirekire ari mu mvune. Uyu mukino ni imwe mu mikino ikipe ya Inter Miami izakinira muri Saudi Arabia kuko no ku wa 01 Mutarama 2024 iyi kipe izahura na Al-Nassr ya kizigenza Cristiano Ronaldo.

Abakinyi batsinze ibitego bya Al-Hilal ni Mitrovic ku munota wa 10, Al Hamdan ku munota wa 13, Michael ku munota wa 44 na Malcom  agiterekamo ku munota wa 88 w’umukino.

Mu gihe abatsindiye Inter Miami ari Suarez wagiteretsemo ku munota wa 34 w’umukino akaba ari nacyo gitego cye cya mbere atsinze kuva yagera muri iyi kipe yo muri Amerika, Lionel Messi atsinda penaliti ku munota wa 54 w’umukino na Ruiz abona izamu ku munota wa 55 w’umukino.