Ku Cyumweru tariki 4 Kanama 2024, umutwe wa M23 urwanira muri Repubulika Iharanira Demokarasi ya Congo, wigaruriye agasantere gakomeye k’ubucuruzi ka Ishasha kari ku mupaka muri teritwari ya Rutshuru, Intara ya Kivu y’Amajyaruguru. https://imirasiretv.com/umusore-wimyaka-21-yarohamye-mu-kiyaga-cya-kivu-amaze-kubatizwa/

Ni agasantere kari ku mupaka ugabanya Repubulika Iharanira Demokarasi ya Congo (RDC) na Uganda, kazwiho kugira urujya n’uruza rw’abantu n’ibicuruzwa biva cyangwa byinjira muri Congo. Ubwo inyeshyamba za M23 zinjiraga muri uwo mujyi, nta masasu yavuze kuko Abapolisi ba Congo basaga 60 bari bahari, bahise bahungira muri Uganda nk’uko byatangajwe na Ijwi rya Amerika.

Ishasha iri mu Majyepfo y’Ikiyaga cya Edward mu bilometero hafi 200 uvuye mu Mujyi wa Goma. Ni imwe mu nzira zisigaye zigemurira Umujyi wa Goma biciye mu muhanda Ishasha – Nyamilima, Kiwanja, Rutshuru centre, Rumangabo, Kibumba ukagera i Goma.

Ishasha ni umupaka wa kane unyuraho ibicuruzwa n’abantu benshi muri Kivu y’Amajyaruguru nk’uko inzego zishinzwe imari muri iyo ntara zabigaragaje mu 2018. Inyeshyamba za M23 zinjiye muri Ishasha nyuma y’umunsi umwe zifashe akandi gace ka Nyamilima, nako kafashwe nta mirwano ibaye. M23 imaze kwinjira muri Ishasha, yahamagaje inama n’abaturage ibasaba gutekana no gusubira mu mirimo yabo. M23 kandi yasabye abagize umutwe wa FDLR baba muri ako gace gusubira iwabo mu Rwanda.

Ishasha ifashwe nyuma y’amasaha make hatangiye agahenge kari kasabiwe mu nama yabereye i Luanda igahuza intumwa za Congo n’iz’u Rwanda, Ingabo za Congo na M23 zari zasabwe kubahiriza ako gahenge, icyakora Umuvugizi w’uyu mutwe yari yatangaje ko iby’aka gahenge bitabareba kuko ntabwo batumiwe muri iyi nama bityo ko batarebwa n’imyanzuro yavuzemo. https://imirasiretv.com/rib-yataye-muri-yombi-umwana-wimyaka-13-ukurikiranyweho-gusambanya-umwana-wimyaka-3/