Fabos Fali 
Umutwe witwaje intwaro wa M23 watangaje ko ugiye gufata Umujyi wa Goma ufatwa nk’Umurwa Mukuru w’Intara ya Kivu y’Amajyaruguru muri Repubulika Iharanira Demokarasi ya Congo.
Umuvugizi wa M23 mu rwego rwa politiki, Lawrence Kanyuka, ku gicamunsi cyo kuri uyu wa 23 Mutarama 2025, yatangaje ko abatuye muri uyu mujyi bababaye cyane, abateguza kubohorwa.
Yagize ati “Abaturage ba Goma barababaye cyane, nk’abandi Banye-Congo. AFC/M23 iri mu nzira ijya kubabohora kandi bagomba kwitegura guha ikaze uko kubohorwa. Ntabwo bakwiye kugira icyo batinya: AFC/M23 igiye kubazanira amahoro.”
Ijambo rya Kanyuka rifite igisobanuro gikomeye kuko kuva mu gitondo cyo kuri uyu wa 23 Mutarama 2025, abarwanyi ba M23 bahanganiye n’ihuriro ry’ingabo za RDC mu mujyi wa Sake, mu bilometero birenga gato 20 werekeza i Goma.
Mu bundi butumwa yatangaje, Kanyuka yamenyesheje ingabo ziri mu butumwa bw’amahoro bw’Umuryango w’Abibumbye (MONUSCO) n’iz’umuryango wa Afurika y’amajyepfo (SAMIDRC) ko nizigerageza kubarwanya, birwanaho.
Ingabo za RDC zohereje indege z’intambara mu bice byegereye Sake, kugira ngo zikure abarwanyi ba M23 muri uyu mujyi. Guverineri w’Intara ya Kivu y’Amajyaruguru, Gen Maj Peter Cirimwami yagiye kuzitera ingabo mu bitugu ariko byabaye iby’ubusa.
M23 ntiri muri Sake gusa, kuko igenzura n’ibindi bice bikikije umujyi wa Goma birimo Minova hafi y’Ikiyaga cya Kivu ndetse na Kibumba muri teritwari ya Nyiragongo.
Fabos Fali 
