Fabos Fali 
Perezida w’umutwe witwaje intwaro wa M23, Bertrand Bisimwa, yashinje Umuryango w’Ubumwe bw’u Burayi (EU) gusuzugura abaturage bo muri Repubulika Iharanira Demokarasi ya Congo.
Nyuma y’aho uyu muryango ushinje M23 kuvogera ubusugire bwa RDC ubwo wafataga santere ya Masisi tariki ya 4 Mutarama 2025, Bisimwa yatangaje ko abarwanyi babo ari Abanye-Congo, bityo ko badakwiye kunengwa ko basubiye iwabo.
Ati “Ni nk’igitutsi gushinja Abanye-Congo kutubaha ubusugire bw’igihugu cyabo. Uburyarya bw’umuryango mpuzamahanga, ukomeje kutita ku burenganzira bwacu bwo kubaho, mu gihe twirwanaho hashingiwe ku ngingo ya 64 y’Itegeko Nshinga, rwose ni ukutubaha abantu bacu.”
Bisimwa yakomeje ati “Masisi ni iwabo w’abaturage benshi, biganjemo abanyamuryango ba AFC/M23, abagabo n’abagore. Ntibikwiye kunenga urugamba rwacu rwo kwirwanaho rwatumye abantu ibihumbi bongera kubona amahoro n’umutekano mu gihugu cyabo.”
Bisimwa yagaragaje ko itangazo rya EU ryirengagiza abacancuro b’Abanyaburayi n’ingabo z’ibindi bihugu zikomeje kwifatanya n’iza RDC mu gutsemba ubwoko bw’Abanye-Congo ndetse n’uburyo umutwe w’iterabwoba wa FDLR ukomeje guhabwa icumbi.
Ati “Ahubwo, Leta ya Kinshasa yakabaye yamaganwa kubera ubutaka bw’Abanye-Congo yahaye umutwe w’abanyamahanga b’abajenosideri (FDLR), ufite amateka maremare yo kwica Abanye-Congo bavuga Ikinyarwanda, cyane cyane Abatutsi.”
Perezida wa M23 yasobanuye ko abarwanyi babo batagaba ibitero, ahubwo ko bafata ibice mu gihe baba birwanaho, iyo ihuriro ry’ingabo za Leta ya RDC ribashotoye.
Ibi byashimangiwe n’Umuvugizi wa M23 mu rwego rwa politiki, Lawrence Kanyuka, wagaragaje ko abarwanyi babo batari bafite umugambi wo gufata santere ya Masisi, ahubwo ko byabaye ubwo bamenyaga ko FDLR yahagize ikigo cy’imyitozo, cyatorezwagamo abajya gutsemba abaturage.
Kanyuka yagize ati “Ntabwo twari dufite umugambi wo gufata santere ya Masisi. Ariko Leta ya Kinshasa yayihaye umutwe wa FDLR w’abajenosideri, bayihindura ibirindiro n’ikigo cyawo cy’imyitozo. Hamwe na FARDC na Wazalendo, iyi mitwe yagabye kenshi ibitero ku baturage no ku birindiro byacu muri Masisi. AFC/M23 nta yandi mahitamo yari ifite, keretse guhagarikira ibi bitero iyo bituruka.”
Intambara ikomeje gufata intera hagati ya M23 n’ihuriro ry’ingabo za Leta ya DRC mu ntara ya Kivu y’Amajyaruguru, kandi nta cyizere cy’uko izahagarara vuba kuko ubutegetsi bw’iki gihugu bwanze gushyikirana n’uyu mutwe, buhitamo kwifashisha imbaraga z’igisirikare, nyamara bwaraburiwe ko icyazana amahoro arambye ari ibiganiro.
Fabos Fali 
