Uko iminsi ishira n’iko intambara ihuza Ingabo za Repubulika Iharanira Demokarasi ya Congo (FARDC) na M23 ikomeza gukaza umurego ndetse ni kenshi twumva umutwe wa M23 wigamba ko wafashe abasirikare benshi bari mu bafatanya na FARDC.

Iyi ntambara Ingabo za Congo zihanganyemo na M23 zifatanya n’abandi bafatanyabikorwa barimo Ingabo z’Abarundi, iza SADC, umutwe wa Wazalendo, abacancuro ndetse n’umutwe wa FDLR ugizwe n’abasize bakoze Jenoside yakorewe Abatutsi mu 1994.

Uretse aba bafatanya abandi barimo ingabo z’Umuryango w’Abibumbye-ONU ziri mu butumwa bw’amahoro muri DR Congo-MONUSCO, icyakora izi ngabo zishinjwa n’abandi barwanyi kubarasaho bakoresha kajugujugu ndetse no gukoresha indege zitagira aba pilote mu butasi bagashyikiriza amakuru FARDC aborohereza kumenya ibirindiro byabo kugirango babaraseho.

Umutwe wa M23 ukunda gutangaza amakuru avuga ko abasirikare benshi bo ruhande rw’ihuriro rya FARDC bagwa muri iyi mirwano abandi batari bacye bakahaburira ubuzima. Icyakora ni kenshi uyu mutwe utangaza ko hari abarwanyi wafashe matekwa, nyamara ugasanga abenshi bibaza aherezo ry’abo barwanyi.

Umuvugizi wungirije wa M23 mu bya Politike, Barinda Oscar ubwo yari mu kiganiro n’itangazamakuru ku wa Kabiri tariki 20 Gashyantare 2024, yabajijwe aho aba barwanyi bafatirwa ku rugamba bajyanwa, avuga ko bakurikiza amategeko mpuzamahanga.

Yagize ati “Iyo dufashe aba FARDC, turakabondora, tukabagaburira, tukabigisha, tukabavura, bagira imbaraga tukabigisha idewoloji (Ideology) yacu n’impinduramatwara turwanira,bakaza tugafatanya muri uru rugamba.”

Yakomeje agira ati “Iyo dufashe abo ku ruhande rwa Monusco, dukurikiza amategeko mpuzamahanga bakabambura intwaro ubundi bakabashyikiriza benewabo.”

Bwana Balinda yatangaje ibi, nyuma y’uko ku munsi w’ejo imirwano mu gace ka Kanyamahoro yari yafashe indi ntera hagati y’impande zombi. Ni mu gihe kandi kugeza ubu umujyi wa Goma unizwe ndetse Sake ikaba iri mu maboko ya M23.