Inyeshyamba za M23 zirwanira mu Burasirazuba bwa Repubulika Iharanira Demokarasi ya Congo, ziravugwaho kuba zatangiye gukorana n’abacancuro b’Abazungu, ni nyuma y’uko kuri iki Cyumweru tariki 10 Gashyantare 2024, zageze mu duce twa Bwalanda, Mines, Katolo na Somikivu.

Amakuru avuga ko abarwanyi ba M23 bageze muri utu duce nyuma y’uko hari hashize iminsi 4 Ingabo za Kinshasa (FARC) na wazalendo bihavuye ngo mu buryo buri stratégique, bituma M23 ihita ifata imijyi ya Nyanzale, Kibirizi, Kirima, na Rwindi nk’uko byatangajwe na Tazama DRC.

Amakuru ahari avuga ko ubwo izi nyeshyamba za M23 zerekezaga mu duce dutandukanye iherutse gufata, hari abavaga i Kibirizi berekeza Rwindi mu ijipe hamwe n’ikamyo ngo yari irimo abantu 2 b’abazungu.

Icyakora abanditse inkuru bavuze ko M23 bikekwa ko yatangiye gukorana na bo bacancuro mu Ukwakira 2023, ndetse byari byaravuze ko bari mu misozi ya Nyiragongo ari yo Bitoborero, Bizuru, Mushushwe na Butobya mu itsinda rya Kibumba.

Kugeza ubu izi nyeshyamba za M23 zikomeje kuguma mu Rwindi n’ahitwa PK17. Aha muri Rwindi, MONUSCO yashinjwe kureka inyeshyamba za M23 zikahinjira irebera ariko yahakanye ayo makuru ishimangira ko ikomeje gushyira mu bikorwa manda yayo yo kurinda abasivili.