Umutwe wa M23 urwanira mu Burasirazuba bwa Repubulika Iharanira Demokarasi ya Congo, watangaje ko wavugutiye umuti ihuriro ry’Ingabo za Congo (FARDC) nyuma y’imirwano yasakiranyije impande zombi Ku wa Mbere, ikabera mu duce dutandukanye twa Teritwari ya Masisi.

M23 ishinja ihuriro rigizwe na FARDC, FDLR, Abazalendo, Abacancuro, Ingabo z’u Burundi n’iza SADC gutera ibirindiro byayo, maze na yo nk’uko ikunda kubitangaza ihita yirwanaho, irengera ubuzima bw’abarwanyi bayo ndetse n’abaturage barashweho.

Uyu mutwe biciye mu bavugizi bawo barimo Lawrence Kanyuka wa Politiki na Lt Col Willy Ngoma wa gisirikare, washimangiye amakuru ko imirwano yo ku wa Mbere yasize ukubise ahababaza ihuriro ry’Ingabo za Leta y’i Kinshasa, mu mirwano yabereye mu duce twa Katsiro no mu nkengero zaho ndetse bata intwaro n’amasasu yabo.

Lawrence Kanyuka abinyujije ku urubuga rwe rwa X, yaraye atangaje ko FARDC, FDLR, Wazalendo, abacancuro, Ingabo z’u Burundi na SADC bakubitiwe bikomeye i Katsiro no mu nkengero zaho ndetse barahunga bata intwaro n’amasasu ku rugamba.

Abavugizi ba M23 bashyize amafoto hanze agaragaza imbunda ziganjemo izo mu bwoko bwa AK-47 uyu mutwe wambuye FARDC n’abambari ubwo bari ku rugamba ndetse bemeza ko ku wa Mbere bakubitiye umwanzi mu mirwano yabereye i Mabenga.

Hari amakuru kandi avuga ko nyuma y’imirwano ikomeye yahuje abarwanyi ba M23 n’ingabo za leta (FARDC) n’abo bafatanyije, uyu mutwe wigaruriye agace ka Nyanzale ndetse bikarakaza cyane Ingabo za Kinshasa kuko ari iwabo wa Gen Sultani Makenga.