Fabos Fali 
Umutwe witwaje intwaro wa M23 kuri uyu wa 18 Ukuboza 2024 wambuye ihuriro ry’ingabo za Repubulika Iharanira Demokarasi ya Congo agace ka Mbingi kari muri teritwari ya Lubero, abatuye mu mujyi wa Butembo basabwa kwirwanaho.
M23 yafashe Mbingi ku gicamunsi, nyuma y’imirwano yamaze umwanya muto. Bivugwa ko muri uwo mwanya, ihuriro ry’ingabo za RDC ryisanze ryagoswe, rifata icyemezo cyo guhunga.
M23 ifashe Mbingi nyuma yo gufata ibindi bice by’ingenzi muri Lubero birimo Matembe, Alimbongo na Mambasa. Leta ya RDC yagaragaje ko gutsindwa kw’iri huriro kwatewe n’uko aba barwanyi bakoresheje drones zigaba ibitero.
Nyuma y’aho bigaragaye ko ihuriro ry’ingabo za RDC ryarushijwe imbaraga, sosiyete sivile ikorera mu mujyi wa Butembo ikomeje ubukangurambaga busaba abaturage kwitegura guhangana na M23.
Perezida w’iyi sosiyete sivile, Mathe Saanane, yagize ati “Mu ijoro ryo ku Cyumweru rishyira ku wa Mbere, M23 yafashe byoroshye Matembe, Thimbothimbo, Vutsorovya, Nduta, Alimbongo na Mambasa. Nta wamenya aho aba barwanyi bari.”
Yakomeje ati “Bitewe n’iki kibazo, ubuyobozi bwa sosiyete sivile mu mujyi wa Butembo burasaba abasivili gushira ubwoba, ntibahungabane.”
Abarwanyi ba M23 bari mu ntera y’ibilometero bigera ku 100 ugana mu mujyi wa Butembo n’ibilometero 50 ugana muri santere ya Lubero. Abaturage benshi bahungiye muri ibi bice kubera ubwoba bw’uko umutekano wabo wahungabana.
Fabos Fali 
