Ibi ni bimwe mu byo yatangaje mu kiganiro yagiranye n’itangazamakuru, kuri uyu wa Gatanu, tariki ya 3 Mutarama 2025, agaragaza aho imyiteguro igeze y’umukino uzayihuza na Liverpool ku wa Gatandatu.

Maguire ni umwe mu bakinnyi bakunze kutavugwaho rumwe n’abakunzi ba Manchester United, ariko abatoza bose bageze muri iyi kipe ntibahwema kwerekana ko ari ingenzi cyane.

Yageze muri iyi kipe avuye muri Leicester City mu 2019 asinya amasezerano azamugeza mu 2026. Ayigeramo yari we myugariro wa mbere uhenze mu mateka y’Isi kuko yatanzweho agera kuri miliyoni 80 z’amapawundi.

Yagerageje gutanga byose ariko kwigarurira imitima y’abakunzi b’ikipe ye bikaba ikibazo. Uyu mugabo wabaye kapiteni w’iyi kipe yakomojweho n’umutoza Amorim wifuza kumwongerera igihe akinira iyi kipe.

Ati “Byamaze kwemezwa ko dukeneye cyane Harry [Maguire]. Agomba kuzamura urwego nk’umuyobozi kuko kugeza ubu nta bayobozi bafatika dufite. Ni ingenzi cyane rero muri uyu mushinga. Tugomba gutangira kubikoraho.”

Mu Ukuboza 2024, ni bwo Maguire yagarutse mu ikipe amaze gukira imvune yari amaranye igihe kirenga ukwezi, kugira ngo akomeze gufatanya na bagenzi be gushaka itsinzi yabaye imbonekarimwe, cyane ko imaze imikino itanu yikurikiranya nta nota na rimwe.

Manchester United kugeza ubu iri ku mwanya wa 14 n’amanota 22 ku rutonde rw’agateganyo rwa Shampiyona y’u Bwongereza.