Fabrice Nahimana 
Manchester United yatsinze Athletico Bilbao ibitego 3-0 mu mukino ubanza wa ½ cya UEFA Europa League wabaye mu ijoro ryo ku wa Kane tariki ya 1 Gicurasi 2025, Kuri Kuri Stade San Mames muri Espagne.
Manchester United yari yasuye ni yo yatangiye umukino isatira cyane, bidatinze ku munota wa 30 ifungura amazamu ku gitego cyaturutse ku mupira wari wahinduwe mu rubuga rw’amahina na Harry Maguire usanga Ugarte awuhereza Casemiro wari wenyine atsindisha umutwe.
Nyuma y’iminota ine, Noussair Mazraoui yahinduye umupira imbere y’izamu, Rasmus Højlund awakiriye bamukinira nabi.
Umusifuzi nyuma yo kureba kuri VAR yahaye ikarita y’umutuku Dani Vivian ndetse anatanga penaliti.
Yatsinzwe neza na Bruno Fernandes wateye mu ruhande rumwe, umunyezamu Julen Agirrezabala ajya mu rundi atsinda igitego cya kabiri ku munota wa 37.
Iyi kipe yo muri Espagne yatangiye gukora impinduka ishaka uko yakwihagararaho ngo idatsindwa ibitego byinshi.
Mu mpera z’igice cya mbere, Ugarte yongeye kuzamukana umupira neza, awucomekera Fernandes winjiye mu rubuga rw’amahina aroba umunyezamu Agirrezabala atsinda igitego cya gatatu, ku munota wa 45.
Igice cya mbere cyarangiye Manchester United yatsinze Athletico Bilbao ibitego 3-0.
Mu gice cya kabiri, iyi kipe yo mu Espagne yagerageje gusatira ishaka uko yakwishyura ibitego ariko abakinnyi ba Manchester bakabyitwaramo neza.
Muri Iki gice ugereranyije n’icya mbere nta buryo bwinshi bukomeye bw’ibitego bwabonetsemo.
Umukino warangiye Manchester United yatsinze Athletico Bilbao ibitego 3-0 mu mukino ubanza wa ½.
Undi mukino wabaye, Tottenham Hotspurs yatsinze Bodo Glimt ibitego 3-1.
Imikino yo kwishyura iteganyijwe ku wa Kane tariki ya 8 Gicurasi 2025.
