Intumwa ihoraho ya Repubulika Iharanira Demokarasi ya Congo muri Loni, Zénon Makongo, yasabye Loni kubuza u Rwanda uburenganzira bwo kuvuga kugeza igihe ingabo zarwo zizaba zavuye ku butaka bwa Congo ndetse ashinja u Rwanda ko ari nyirabayazana w’iraswa rya ‘drone’ za MONUSCO.

Ibi yabitangaje ku wa Kabiri tariki 20 Gashyantare 2024, ubwo yari mu inama y’Akanama k’Umutekano k’Umuryango w’Abibumbye. Mu ijambo yavugiye muri iyi nama yashinje u Rwanda kurunda ingabo nyinshi hafi y’imipaka y’ibihugu byombi ndetse arushinja gufatanya na M23 mu karasa muri iki gihugu nko kurasa ku Kibuga cy’indege cya Goma.

Ambasaderi Makongo yagize ati “Ubu bushotoranyi bwa Leta y’u Rwanda bugize mu mategeko mpuzamahanga, icyaha cya Leta no kuvogera cyane ubusugire bwa RDC. Iki kibazo cyatumye abagore n’abana miliyoni 7 bava mu byabo mu turere twa Rutshuru, Masisi na Nyiragongo ndetse abatari bake bahaburira ubuzima.”

Uyu muyobozi kandi yakomeje avuga ko yijeje Akanama k’Umutekano k’Umuryango w’Abibumbye ko hari ingamba zafashwe n’abayobozi ba Congo mu rwego rwo kurinda umutekano w’abakozi ba MONUSCO nyuma y’imyigaragambyo y’abasivili yabaye ku itariki ya 10 Gashyantare i Kinshasa yari igamije kwamagana Umuryango Mpuzamahanga n’u Rwanda.

Zenon Mukongo yasabye akanama k’Umuryango w’Abibumbye gashinzwe umutekano gusaba u Rwanda kuvana ingabo zayo mu buryo budasubirwaho ku butaka bwa Repubulika Iharanira Demokarasi ya Congo no guhagarika inkunga iyo ari yo yose rutera umutwe wa M23, kuko n’iyo nyirabayazana yo gukomeza imirwano iyo ari yo yose mu Burasirazuba bwa Congo.

Icyakora n’ubwo uyu mudipolomate atangaje ibi ni kenshi u Rwanda rwakunze guhakana ibyo guha ubufasha uyu mutwe nk’uko Leta ya Kinshasa ibivuga, ahubwo rugashinja iki gihugu gufasha umutwe wa FDLR urwanya Leta y’u Rwanda.

Ivomo: Bwiza