Uwamahoro Vestine umubyeyi wo mu Mudugudu wa Mikingo mu Kagari ka Mubumbano mu Murenge wa Kagano, Akarere ka Nyamasheke, arashakishwa n’inzego z’umutekano akaba akekwaho kwiyicira umwana w’amezi ane. Inkuru yamenyekanye ni uko uyu Uwamahoro yavuye mu Kagari ka Mubumbano ku wa 29 Ugushyingo 2023 ari kumwe n’umwana we ariko ku wa 03 Ukuboza agaruka atamufite.

Umwana wa Uwamahoro bivugwa ko yitwa Masengesho Emmanuel. Uyu mubyeyi agitaha abaturanyi be bagize amakenga bamubaza aho umwana we ari maze abasubiza ko yaguye mu Bitaro bya Bushenge, bakomeje kumuhata ibibazo ahita abatoroka. Muhayeyezu Joseph, Umuyobozi w’agateganyo w’Akarere ka Nyamasheke, yabwiye itangazamakuru ku uretse amakuru yatanzwe na Uwamahoro nta kindi baramenye.

Yagize ati” Biracyari mu iperereza, aracyashakishwa, kuba atarabineka ngo atange ibisubizo ku ibura ry’uwo mwana nibyo biteye inkeke, nizeye ko ari buboneke vuba kugira ngo tubone amakuru arambuye yaho uwo mwana ari.” Muhayeyezu yasabye abaturage kuzirikana uburenganzira bw’umwana abibitsa ko umwana afite uburenganzira bwo kurindwa no kwitabwaho ndetse anakomeza gusaba abaturage umuco wo gutangira amakuru ku gihe.