Kuri iki Cyumweru tariki 3 Ukuboza 2023, Minisiteri y’Uburezi ibinyujije ku rukuta rwayo rwa X yatangaje ko igiye gutangaza amanota y’Ibizamini bya Leta bisoza amashuri yisumbuye mu mwaka w’amashuri wa 2022/2023. Iyi Minisiteri yatangaje ko aya manota arasohoka kuri uyu wa Mbere tariki 4 Ukuboza 2023. Abanyeshuri basoza amashuri yisumbuye abakoze ibizamini bya Leta ni 48 674 barimo abahungu 21 307 n’abakobwa 27 367.

Mu butumwa iyi Minisiteri y’Uburezi yashyize ku rukuta rwa X kuri uyu wa 3 Ukuboza 2023 bugira buti” Minisiteri y’Uburezi iramenyesha Abaturarwanda bose ko ejo ku wa Mbere tariki ya 4 Ukuboza 2023 Saa Saba z’amanywa, hazatangazwa amanota y’ibizamini bya Leta bisoza amashuri yisumbuye, umwaka w’amashuri wa 2022-2023.”

Muru uyu mwaka w’amashuri Minisiteri y’uburezi yatangaje ko ahantu ho gukosorerwa ibizamini bya Leta hongerewe aho kuba 19 haba 34 kugira ngo abanyeshuri bava mu cyiciro kimwe bajya mu kindi bashobore gutangirira rimwe n’abandi. Aya manota agiye gutangazwa aje akurikiye ay’abanyeshuri basoza amashuri abanza ndetse n’icyiciro rusange yasohotse tariki ya 12 Nzeri 2023.