Fabos Fali 
Minisitiri w’Umutekano muri Israel, Itamar Ben-Gvir, yatangaje ko mu gihe amasezerano y’agahenge hagati y’ingabo za Leta n’umutwe wa Hamas azaba ashyizwe mu bikorwa we n’ishyaka rye, atazakomeza kuguma muri guverinoma.
Minisitiri Ben-Gvir wo mu ishyaka rya Otzma Yehudit (Jewish Power Party), yabwiye Minisitiri w’Intebe Benjamin Netanyahu ko amasezerano y’agahenge hagati y’ingabo za Leta n’umutwe wa Hamas niyemezwa azahita yegura.
Yagize ati “Mu gihe aya masezerano yashyirwaho umukono, ishyaka ryacu rizahita riva ku buyobozi.”
Yakomeje avuga ko ibikorwa byo gufasha abaturage ba Gaza birimo kubagezaho ibiribwa, amazi, n’amashanyarazi “Bigomba guhagarara” kugira ngo Hamas irekure imfungwa za Israel hatabayeho kubangamira umutekano w’igihugu.
Ben-Gvir yanasabye Minisitiri w’Imari wa Israel, Bezalel Smotrich, uyobora ishyaka rya Religious Zionist Party, ko mu gihe aya masezerano yasinywa na we yakwegura
Al Jazeera yanditse ko aya mashyaka yombi adashyigikiye Netanyahu, Guverinoma ye ihuriweho yatakaza ubwiganze mu Nteko Ishinga Amategeko.
Gusa amashyaka atavuga rumwe n’ubutegetsi yatangaje ko yiteguye gushyigikira Netanyahu mu gihe agahenge kemejwe n’Inteko Ishinga Amategeko.
Ishyaka rya Likud riyobowe na Netanyahu ryamaganye ibi bitekerezo, rivuga ko nibabikora bizaba bigayitse.
Aya masezerano ari kugirwamo uruhare rukomeye na Leta Zunze Ubumwe za Amerika, Misiri na Qatar, biteganyijwe ko icyiciro cyayo cya mbere kizashyirwa mu bikorwa mu gihe cy’amezi abiri.
Intambara hagati y’ingabo za Israel na Hamas yatangiye ku wa 7 Ukwakira 2023, nyuma y’igitero uyu mutwe wagabye kigahitana abanya-Israel 1200 abandi barenga 250 bagatwarwa bunyago.
Imibare ya Minisiteri y’Ubuzima muri Gaza igaragaza ko abantu 46.788 ari bo bamaze guhitanwa n’intambara.
Fabos Fali 
