Miss Keza Maolithia wegukanye ikamba ry’Igisonga cya mbere mu irushanwa rya Miss Rwanda mu 2022 ari nayo iheruka kuba, yifashishije imbuga nkoranyambaga akoresha yerekanye umusore yahebeye umutima we.

Abinyujije ku mbuga nkoranyambaga akoresha, Keza Maolithia yifashishije icyanditswe muri Bibiliya mu Bakolinto ba mbere, umurongo wa 13, hagaragaza ko urukundo ruhebuje byose kuba ingenzi.

Ayo magambo Maolithia yaherekesheje amafoto ari kumwe n’uyu musore yihebeye witwa Cedric Rutazigwa, amwifuriza umunsi mwiza w’abakundana ‘St Valentin’.

Uyu musore ni umwe mu bamaze kubaka izina muri Kigali by’umwihariko mu gukoresha abantu imyitozo ngororamubiri.

Amakuru ahari ahamya ko urukundo rw’aba bombi rumaze igihe nubwo batigeze barushyira ku karubanda.

Keza Maolithia yamenyekanye mu 2022 ubwo yitabiraga irushanwa rya Miss Rwanda ahagarariye Intara y’Iburengerazuba. Yabaye Igisonga cya mbere cya Miss Muheto Nshuti Divine.