Moise Katumbi Chapwe umwe mu bakandida biyamamarije kuyobora RD Congo, yiyongeye ku bandi bakandida batanu bavuze ko amatora yari ateganyijwe muri iki gihugu kuri uyu wa 20 Ukuboza 2023, yaranzwe n’uburiganya bw’amajwi ndetse akaba yarakozwe mu buryo bunyuranyije n’amategeko, bityo ko ibyavuyemo byaseswa, akongera gusubirwamo.

Uretse Katumbi watangaje ibi hari abandi bakandida barimo Martin Fayulu, Denis Mukwege, Theodore Ngoyi, Nkema Lilo na Floribert Anzuluni, bavuze ko uburyo Komisiyo yigenga ishinzwe amatora, CENI yateguyemo amatora binyuranyije n’Itegeko Nshinga. Ibi babivuze nyuma y’uko hafashwe icyemezo cyo kongera igihe cy’amatora, kuri site z’itora zafunguwe zikerewe.

Moise Katumbi wari usanzwe uyobora Intara ya Katanga, kuri uyu wa 23 Ukuboza 2023, yatangaje ko ibyavuye mu matora bitagomba gushingirwaho kuko “yaranzwe n’ubujura bw’amajwi ku rwego rwo hejuru.” Nubwo yatangaje ibi kandi Denis Mukwege na Martin Fayulu bakomeje kugaragaza ko bari gutegura imyigaragambyo mu kugaragaza ko ibyavuye mu matora bitabanyuze.

Aba bakandida batangaje ibi bashingiye ku biherutse gutangazwa, nyuma y’uko abanye-Congo batuye hanze y’iki gihugu batoye, Tshisekedi akaza ku mwanya wa mbere ndetse bikaba bivugwa ko ari we uhabwa amahirwe menshi yo kongera kuyobora iki gihugu.