Nyuma y’uko ku Cyumweru gishize M23 yigaruriye agace ka Rwindi bikavugwa ko MONUSCO yarebereye aba barwanyi b’uyu mutwe kugeza ubwo aka gace gafashwe, yatangaje ko yitandukanyije n’ibihuha biri kuyishinjwa.

Ubwo M23 yari imaze gufata aka gace Ingabo za MONUSCO zashyizweho igitutu zishinjwa kutagira icyo zikora ku nyeshyamba za M23, ubwo zarimo zinjira i Rwindi ndetse ku mbuga nkoranyambaga hatangira gusakara amashusho y’abarwanyi bikekwa ko ari aba M23 binjira muri aka gace.

Ingabo za MONUSCO bitekerezwa ko ziba muri kariya gace zigaragara zirebera izi nyeshyamba, ubwo zarimo zikinjiramo, aho kubarwanya kuko ubusanzwe izi ngabo ziha ubufasha ingabo za Kinshasa (FARDC) zimaze imyaka irenga ibiri zihanganye na M23 mu ntambara iri mu Burasirazuba bw’iki gihugu.

Kuri uyu wa Mbere tariki 11 Werurwe 2024, MONUSCO yanyujije ubutumwa kuri X ihakana aya amakuru yo kurebera inyeshyamba za M23 zinjira i Rwindi, agace gaherereye mu ntara ya Kivu y’Amajyaruguru. Yagize iti “MONUSCO irahakana ku mugaragaro inkuru yatangajwe kuri Rwindi hakoreshejwe aya mashusho, irayerekana.”

Muri ubu butumwa kandi MONUSCO yakomeje ivuga ko ikirajwe imbere no gushyira mu bikorwa inshingano zabwo zo kurinda abaturage, biciye mu gushyigikira ingabo za Repubulika Iharanira Demokarasi ya Congo mu ntambara zihanganyemo n’aba barwanyi ba M23.