Ikigo cy’igihugu cy’ibarurishamibare mu Rwanda, NISR cyagaragaje ko mu mwaka wa 2022 habaruwe abantu 25,577 bapfuye mu gihugu higanjemo abenshi bo mu ntara y’amajyepfo. Ni raporo nshya ya NISR yitwa Rwanda Vital Statistic ya 2022 igaragaza ko indwara zitandura nka cancer, stroke, impanuka ndetse n’indwara z’umutima biri mu bihitana ubuzima bw’abanyarwanda cyane.

Hagendewe ku buryo abantu bapfuye mu ntara, I Burasirazuba habaruwe abantu 5,195, umujyi wa Kigali hapfuye 2,245, Amajyaruguru 5,256, Amajyepfo niho hapfuye abantu benshi muri 2022, kuko habaruwemo abantu bapfuye bagera kuri 6697 mu gihe Uburengerazuba ho hapfuye 5,884.

Kubera ko umubare w’abakiri bato ari wo munini mu Rwanda, usanga aribo bapfa cyane kuko baba bafite ibyo byago, kandi hagakunda gupfa abari munsi y’imyaka 5. Ku rundi ruhande nubwo ab’igitsinagore ari bo benshi mu Rwanda kuko ari 51.4%, ntabwo aribo bapfa cyane ahubwo abagabo nibo bapfa ari benshi nk’uko ibarura ribigaragaza.

Iyi raporo igaragaza abantu bapfuye bagiye bapfira mu ngo, impanuka n’abaguye mu mavuriro cyangwa ibitaro. Kubera ko kandi hari abantu bapfa ntihatangwe raporo, birashoboka ko uyu mubare wagaragaye mu ibarura rusange ari muke kurusha uwa nyawo.

Itegeko riteganya ko umuntu wapfuye abarurwa bitarenze iminsi 30. Kuva 2020, mu bitaro n’amavuriro hashyizweho uburyo bw’ikoranabuhanga bwo kubarura abavuka n’abahapfira. Muri 2019 hapfuye abantu 23,791, mu gihe muri 2020 hapfuye abantu 22,634 n’aho muri 2021 hapfuye 19,797.

Mu mwaka wa 2022, mu bantu 25,577 bapfuye, 14,041 bapfuye ni abagabo mu gihe abasigaye 11,495 ari abagore. Ni imibare igaragaza kandi ko muri 2022 mu bana bari munsi y’imyaka 5 hapfuye 43,9/1000.