Nairobi muri Kenya Kugeza ubu habonetse imirambo 21 ku butaka bw’umupasiteri wafashwe azira kubwira abayoboke be kwiyiriza ubusa bamwe bikabaviramo urupfu.

Umuyobozi wa polisi yo mu gace ka Malindi John Kemboi, yatangaje ko hakiri imva nyinshi zitaratabururwa ku butaka bwa pasiteri Paul Makenzi, watawe muri yombi ku ya 14 Mata azira kuyobya abanyedini.

Abandi bantu bane bapfuye nyuma yuko bo hamwe n’abandi basanzwe bishwe n’inzara ku rusengero mpuzamahanga.

Polisi yasabye urukiko kubemerera gufata Makenzi igihe kirekire mu gihe iperereza ku rupfu rw’abayoboke be rigikomeje.

Amakuru yatanzwe n’abaturage yatumye abapolisi bagaba igitero ku mutungo wa pasiteri muri Malindi, aho basanze abantu 15 bafite intege nke, barimo bane bapfuye. Abayoboke bavuze ko bashonje kubera amabwiriza bahawe na pasiteri yo kwiyicisha inzara ngo kugira ngo bazahure na Yesu.

Polisi yari yabwiwe ko hari abantu benshi bashyinguwe mu murima wa Makenzi nuko hatangizwa igikorwa cyo gucukura kuri uyu wa gatanu. Ni nyuma yuko uyu mu pasiteri yari amaze minsi ine, akora imyigaragambyo yise iy’inzara ubwo yari mu maboko ya polisi.

Si ubwa mbere kandi uyu mu Pasiteri yari atawe muri yombi, kuko byari byarigeze kubaho kabiri, aho ni muri 2019 no muri Werurwe uyu mwaka, aho yari akurikiranweho ibijyanye n’urupfu rw’abana. Izo nshuro zose, yarekurwaga by’agateganyo, kugeza ubu kandi izo manza zombi ziracyakurikiranwa n’urukiko.

Abanyapolitiki bo muri iki gihugu basabye urukiko ko kuri iyi nshuro atarekurwa, banamaganira kure ikwirakwizwa ry’imigenzo nk’iyi muri aka gace ka Malindi.