Komisiyo y’amatora muri Namibia yatangaje ko Netumbo Nandi-Ndaitwah, wo mu ishyaka SWAPO riri ku butegetsi muri Namibia, ari we watsinze amatora y’umukuru w’igihugu.

Komisiyo yatangaje ko yabonye amajwi arenga 57,31%, akurikirwa na Panduleni Itula, wabonye amajwi 25,50%.

Aya matora ntabwo yakozwe uko byari biteganyijwe kubera ibibazo tekinike ndetse n’ibura ry’ibikoresho byabaye muri iki gihugu, kuko yatangiye kuwa wa gatatu w’icyumweru gishize tariki 27 kugeza tariki 30 Ugushyingo 2024 mu gihe byari biteganyijwe ko akorwa umunsi umwe.

Nandi-Ndaitwah, w’imyaka 72 nyuma yo gutangazwa ko ariwe watsinze amatora yavuze ko igihugu cye cyatoye neza nk’uko ibiro ntaramakuru by’abongereza Reuters byabitangaje.
Ati “Igihugu cya Namibia cyatoreye amahoro n’umutekano.

”

Umukandida Panduleni Itula we ntiyemera ibyatangajwe na Komisiyo y’amatora kuko avuga ko ariwe uri kw’isonga mu kugira amajwi menshi agakurikirwa n’ishyaka riri ku butegetsi.

Nandi-Ndaitwah, watorewe kuba Perezida w’iki gihugu yari asanzwe ari Visi Perezida akaba ni umurwanashyaka ukomeye w’ishyaka SWAPO riri ku butegetsi ndetse akaba yari amaze imyaka 25 mu buyobozi.

Amashyaka atavuga rumwe n’ubutegetsi yanze kwitabira igikorwa cyo gutangaza ibyavuye mu matora cyabereye mu murwa mukuru Windhoek tariki 3 Ukuboza 2024. Ishyaka rya IPC ryo ryavuze ko rishaka ubutabera mu nkiko ndetse rishishikariza abaturage batabashije gutora kubera ibibazo tekinike byabaye mu matora bumva batarashoboye gutora kubera imicungire mibi y’akanama k’amatora, kujya kuri polisi bagatanga ikirego.

Nandi-Ndaitwah namara kurahirira izi nshingano azaba abaye umugore wa Kabiri muri Afurika ubaye Perezida nyuma ya Perezida wa Tanzania Samia Suluhu Hassan.