Uyu mugore ufite imyaka 84, yari mu Burayi muri Luxembourg aho yari yagiye kwizihiza imyaka 80 ishize habaye urugamba rwa Bulge rwabaye mu ntambara ya kabiri y’Isi yose, aho yari kumwe n’irindi tsinda ry’abadepite.

Ibiro bye byavuze ko “yagize igikomere ubwo yari mu mirimo, ajyanwa kwa muganga kugira ngo akorerwe igenzura.”

Bavuze kandi ko ari kubona ubuvuzi bwiza buri gutangwa n’abaganga ndetse n’abandi bakora mu nzego z’ubuzima muri Luxembourg.

Gusa uyu mugore ntabwo azakomeza gukora ibikorwa byari bisigaye mbere y’uko uru rugendo rusozwa.

Amakuru atemejwe neza avuga ko Pelosi ashobora kuba yaguye hasi akavunika itako, ndetse bikavugwa ko azakenera kubagwa kugira ngo akire neza.

Uyu mugore amaze imyaka 37 mu Nteko Ishinga Amategeko ya Amerika ahagarariye San Francisco, ibimugira umwe mu bayimazemo igihe kinini kurusha abandi.

Pelosi kandi yavuzwe cyane muri Nyakanga ubwo yashinjwaga kugira uruhare mu guhindura Joe Biden, agasaba ko asimburwa na Kamala Harris mu matora ya Perezida wa Amerika.

Bivugwa ko iki ari icyemezo yaje kwicuza nyuma yo kubona uburyo Harris yatsinzwe, cyane ko iki cyemezo cyanazambije imibanire myiza yari afitanye na Joe Biden.

Pelosi yayoboye Inteko Ishinga Amategeko ya Amerika mu gihe cy’imyaka umunani muri manda ebyiri zitandukanye, ubwa mbere ikaba iyo mu 2007 kugera mu 2011 na 2019 kugera 2023.