Ni inkuru yakiriwe mu buryo butandukanye, aho benshi bumvaga ko uyu mutoza wesheje uduhigo twinshi twiza yari akwiye kugumana n’Amavubi.

Ni we mutoza wagize amanota menshi mu majonjora ya CAN, ni we watsinze imikino myinshi hanze, ni we wayoboye itsinda ry’amajonjora y’Igikombe cy’Isi igihe kirekire, ni we washoboye gutsinda Nigeria bwa mbere mu mateka, ni we wagize intsinzi nyinshi mu gihe gito kuva mu 2009 ndetse n’ibindi.

Ibi byose ariko ntibyashoboye kwemeza FERWAFA na Minisiteri ya Siporo ngo yongererwe amasezerano. Iri Shyirahamwe ryahise ritangaza ko mu minsi ya vuba Ikipe y’Igihugu n’abakunzi bayo bazamenyeshwa umutoza mushya.

Icyo kwibaza kugeza aya magingo, ni uwuhe mutoza ukwiriye Ikipe y’Igihugu?

Igihe kirageze ngo Amavubi areke gukomeza gutekereza gusarura aho atabibye

Iyo usubije amaso inyuma, usanga Amavubi amaze gutozwa n’abatoza bagera kuri 13 kuva muri 2010 ubariyemo n’abagiye bayatoza by’agateganyo. Muri aba bose, uretse Sellas Tetteh wageze mu Rwanda amaze guhesha Ghana “y’abato” Igikombe cy’Isi, abandi nta wari ubazi mbere yo gukandagiza ikirenge i Kigali.

Ibi bisa no gukina imikino y’amahirwe byabaye nk’ibihira Amavubi ku bwa Stephen Constantine na Frank Spittler, ariko iyi mikino nk’iy’urusimbi igihe kirageze ngo ihagarare niba koko Ikipe y’Igihugu yifuza guhatana n’andi mahanga ndetse no kwitabira amarushanwa atandukanye.

Nk’urugero, ikipe y’igihugu y’abaturanyi ya Uganda itozwa na Paul Put, umutoza uzwi muri Afurika waciye mu bihugu nka Burkina Faso, Gambia, Guinée n’ibindi. Repubulika Iharanira Demokarasi ya Congo ifite Sébastien Desabre watoje amakipe yose akomeye muri Afurika mu gihe Tanzania iheruka kugira Adel Amrouche wayijyanye mu Gikombe cya Afurika, ari na we wubatse ikipe ifite ubu.

Hari umugani umwe mu ndimi z’amahanga uvuga ko iyo ushaka ikintu utarabona uba ugomba gukora ikintu utari wakora. Amavubi ntagira abakinnyi b’amazina akomeye bakina hanze bakanga abo tugiye guhura. Birasaba izina rikomeye ry’umutoza uzwi nk’uko bigenda ahandi hose.

Nk’ikipe ishaka kujya mu Gikombe cya Afurika, Amavubi yagatekereje ku mutoza usanzwe umenyereye aya marushanwa, haba kuyakina ndetse no guhesha amakipe itike yo kuyakina. Nibitaba ibyo tugakomeza guterera igiceri mu kirere, bizatuma inzozi zo gukina amarushanwa akomeye zikomeza kuba nk’iza wa muntu w’umukene twize hambere. Ko mu zindi nzego bajya kwigira ku babarusha ubunararibonye, bagashaka ibisubizo bibereye Abanyarwanda, mu mikino bibananiza iki?

Akeza karigura, Amavubi si ayo kurushwa imishahara n’amakipe asanzwe

Kimwe mu byatunguye abantu ubwo hatangazwaga ko umutoza Frank atacyongerewe amasezerano ni ukumva ko mu byo bapfuye harimo n’umushahara w’ibihumbi 20 mu madorali ya Amerika. Aya si amafaranga make, ariko si na menshi ugereranyije n’uko isoko rihagaze.

Nko muri APR FC, indi kipe na yo ikoresha amafaranga ya Leta, abatoza bose bahabwa umushahara w’ibihumbi 45 by’Amadolari. Amakipe ya APR BBC, Patriots na REG muri Basketball na yo ntabwo ari kure y’iyo ngano ndetse hamwe akayirenza.

Byaba ari igisebo umutoza aramutse atemewe mu Rwanda atari ukubera ubushobozi buke ahubwo ari ukubera amikoro. Abatoza beza barahenze, kandi aho kuzana uzaza gushakira izina mu Rwanda nk’uko benshi bagiye babikora bikarangira ntacyo barugejejeho, byaruta ukazana uwaryubatse uzaduhendera ukuri.

Ibyishimo birahenda

U Rwanda kuri ubu ni cyo gicumbi cya siporo mu Karere ka Afurika y’Iburasirazuba, intego ni ukuba gutyo muri Afurika yose ndetse no ku Isi. Umwongereza yagize ati “The Sky is the Limit”. Ibi bikwiye kujyana n’umusaruro mu kibuga, kuko ubuyobozi bw’igihugu ntacyo budakora ngo bigerweho. Ahasigaye ni ah’abafata ibyemezo.

Ese tuzakomeza kuba insina ngufi, cyangwa igihe ni iki cyo kwereka Isi ko duhari? Kandi burya mu mikino, izina rigira uruhare mu musaruro, umugabo natanga ni Real Madrid ya Florentino Pérez.