Perezida Paul Kagama yasabye abayobozi kwirinda gushyira imbere inyungu zabo bwite, ahubwo bagashyira mu bikorwa ibihindura imibereho y’abaturage. Ibi Kagame yabigarutseho kuri uyu wa 13 Nzeri 2023 ubwo yakiraga indahiro ya minisitiri mushya wa minisiteri y’ibikorwaremezo,Dr Gasore Jimmy .

Perezida Kagame nyuma yo kwakira indahiro ye, yamugiriye inama kimwe n’abandi bayobozi mu nzego zitandukanye yo kuvana ibintu mu mvugo ahubwo bikajya mu bikorwa, kandi bikaba ari ibikorwa bihindura ubuzima bw’abaturage. Perezida Kagame yavuze ko bidakwiriye kubona ibintu bishobora gukorwa vuba bidindira.

Yagaragaje ko ibidakorwa vuba kubera amikoro make bidakwiriye kugendera ku muvuduko umwe n’ibyabonewe amikoro. Minisiteri y’ibikorwaremezo Dr Gasore yatangiye kuyobora, ni minisiteri ikora cyane by’umwihariko ku buzima bw’abaturage kuko irimo gukwirakwiza amazi n’amashanyarazi, gutwara abantu n’ibintu ndetse n’ibindi bikorwa remezo birimo n’iby’imihanda.