Umuvugizi wa Polisi mu ntara y’Amajyaruguru, SP Jean Bosco Mwiseneza, yemeje amakuru y’urupfu rw’umusore witwa Manirakoze Fidel w’imyaka 19 aho umurambo we wasanzwe mu kidendezi cy’amazi. Ibi byabereye mu mudugudu wa Mudende, akagali ka Kibuguzo mu murenge wa Shingiro mu karere ka Musanze.

Byabaye nyuma y’uko nyina yari amutumye kuvoma saa kumi n’ebyiri zo ku mugoroba ariko aramutegereza araheba, niko guhuruza avuga ko yabuze umwana. Inzego z’umutekano zifatanyije n’abaturage, batangiye igikorwa cyo gushaka uyu musore igitaraganya.

SP Mwiseneza yagize ati “Byageze saa munani z’ijoro aba abonetse mu kidendezi cy’amazi hafi y’umugezi wa Susa.” Yatangaje ko hakomeje iperereza kugira ngo hamenyekanye icyateye urupfu rwa Manirakoze, mu gihe umurambo we wajyanwe ku bitaro bikuru bya Ruhengeri gukorerwa isuzuma mbere y’uko ushyingurwa.