Umunyamakuru w’imikino kuri Radiyo Fine FM, Sam Karenzi asanga abakunzi ba Rayon Sports bakwiye kumuha icyubahiro cyinshi ndetse bakamusaba imbabazi kuko ari umwe mu batumye ubuyobozi bw’iyi kipe bukanguka.

Hashize igihe kinini buri munsi Sam Karenzi yibasirwa na bamwe mu bakunzi ba Rayon Sports n’ubwo hari undi mubare munini ukunda uburyo avugisha ukuri kugamije kubaka iyi kipe igatera imbere ikongera kwegukana ibikombe nk’uko byahoze.

Mu kiganiro Urukiko rw’Ubujurire rw’Imikino cyo kuri uyu wa Kane tariki 11 Kanama 2022, umunyamakuru Sam Karenzi yavuze ko hari abakunzi ba Rayon Sports bamushimiye nyuma y’uko avuze ibitagenda ku buyobozi bigatuma bimwe bihinduka.

Yagize ati “Hari abakunzi benshi ba Rayon Sports bampamagaye barambwira ngo kuba Rayon Sports iguze Paul Were Ooko na Boubacar Traore ni ukubera igitutu washyize ku buyobozi, kandi koko abafana ba Rayon Sports bakwiye kunshimira kuko abanyamakuru twese tuje tugashimagiza ibidahari ikipe yakomeza kugana ahabi ariko kuvuga ibitagenda bituma bikosoka”.

Kuva mu mwaka wa 2020, umunyamakuru Sam Karenzi ntabwo yemeraga ubuyobozi bwa Rayon Sports bwariho burangajwe imbere na Munyakazi Sadate, ubwo uyu mugabo yeguzwaga na MINISPORTS ifatanyije na RGB byashimishije Karenzi cyo kimwe n’abandi bakunzi benshi ba Rayon Sports.

Mu mpera za 2020 ubwo MINISPORTS na RGB bashyiragaho Komite Nyobozi nshya irangajwe imbere na Rtd Capt Uwayezu Jean Fidele, umunyamakuru Sam Karenzi yavuze ko bongereye ibinyoro mu bibembe ko nta musaruro ushimishije abona bazageza ku ikipe, kugeza n’ubu ubu buyobozi nta musaruro bwari bwabona.

Karenzi Sam ni umwe mu banyamakuru bakunzwe cyane mu gisata cy’imikino, yakoreye ibitangazamakuru bitandukanye birimo Radio Salus, Radio 10 na Fine FM abarizwaho ubu, azwiho kutarya indimi ibintu atandukaniyeho n’abandi banyamakuru benshi.