Kuri iki cyumweru tariki 24 Nzeri 2023 mu gihugu cy’u Bwongereza kuri stade Emirates habaye umukino wahuje ikipe ya Arsenal na Tottenham zombi ziva mu majyaruguru ya London, uyu mukino wari utegerejwe na benshi kuko izi kipe zanganyaga amanota.

Uyu mukino ukaba warebwe n’umukuru w’u Rwanda, aho warangiye amakipe yombi anganya ibitego 2-2, bituma n’ubundi Tottenham ikomeza kuguma imbere ya Arsenal kuko zombi zifite amanota 14, ariko Tottenham ikaba izigamye ibitego umunani mu gihe Arsenal izigamye ibitego 5.

Perezida Paul Kagame usanzwe ukunda iyi kipe ya Arsenal,yarebye uyu mukino imbonankubone kuri Emirates Stadium aho yari ari kumwe na rurangiranwa muri ruhago y’Isi, Nwankwo Kanu wanakiniye amakipe menshi y’i Burayi harimo n’iyi ya Arsenal, n’ikipe y’Igihugu ya Nigeria.

Perezida Paul Kagame akunze kugaragaza ko akunda iyi kipe, ndetse mu minsi yashize aherutse kugaragaza ko abuzukuru be babiri’abana ba Ingabire Ange Kagame’ na bo ari abafana ba Arsenal.ni mu ifoto yashyize ku rubuga rwa X y’aba buzukuru be bambaye imyenda ya arsenal.