Mu Gihugu cya Nouvelle-Zelande, abanyeshuri biga mu mashuri yisumbuye bahawe itegeko ryo kudakoresha za telefone, bikaba bivugwa ko ariyo intandaro yo gusubira inyuma kw’ireme ry’uburezi muri icyo Gihugu. Iri tegeko ryasohotse nyuma y’uko iki gihugu cyazaga mu biyoboye ku Isi mu ireme ry’uburezi ariko kugeza ubu urwego rwo gusoma no kwandika rwaragabanutse.

Ubushakashatsi bwakozwe muri iki Gihugu bari kwiga ku gitera kugabanuka ku ireme ry’uburezi bwagaragaje ko telefone zibigiramo uruhare, ndetse mu gihe zigikomeje gukoreshwa gutyo iryo reme rizakomeza kugwa mu mashuri yo muri iki gihugu. Minisitiri w’Intebe, Christopher Mark Luxon uherutse gutorwa yavuze ko agiye guhagarika ikoreshwa rya telefone mu minsi 100 ye ya mbere amaze ku butegetsi.

Minisitiri Luxon yavuze ko agiye gukurikiza Politioke nziza kandi yagiye itanga umusaruro mwiza mu bihugu byo mu burengerazuba bw’Isi nka Leta Zunze Ubumwe za Amerika, Ubufaransa n’Ubwongereza aho abanyeshuri baho batemerewe kwigana telefone. Yatangaje ko ibi kandi bizafasha abana kwibanda no gushyira umuhate mu gusoma nta burangare bityo imitsindire izamuke.