Ikipe ya Kiyovu Sports yongeye guhura n’uruva gusenya nyuma yo gutsindwa umukino wa karindwi wikurikiranya. Kuri uyu wa Kabiri, Kiyovu Sports yatsinzwe na Gasogi United ku bitego 4-3 mu mukino w’umunsi wa cyenda wa shampiyona y’umupira w’amaguru mu Rwanda, ikaba ikomeje kujya habi.

Kiyovu Sports yahuye n’imbogamizi zo kubura abakinnyi bashya, kubera ko itaremererwa kongera abandi mu gihe cya vuba, ibi bikaba ari ingaruka y’ibihano yafatiwe na FIFA. Ibi byatumye ikipe ikomeza gutsindwa, itarabonera umuti ibyo bibazo.

Nyuma y’uru ruhererekane rw’ibihe bikomeye, abafana ba Kiyovu Sports bo ku Mumena batakambiye Umukuru w’Igihugu, Nyakubahwa Paul Kagame, n’inzego za Leta, basaba ko batabarwa kuko ikipe yabo iri mu bibazo bikomeye.

Bamwe mu bafana  bagize bati, “Nyakubahwa Perezida wa Repubulika, turakwinginze ngo udutabare. Ikipe yacu igeze habi ku buryo nta gikozwe izamanuka mu cyiciro cya kabiri.”

Hari n’abandi bavuze bati, “Leta y’u Rwanda nidufashe icyemure ikibazo cya Kiyovu nk’uko yacyemuye icya Rayon Sports. Abana bose ni bamwe; nibihutirwe, niba ntacyo gikozwe ikipe iragenda imbere yacu.”

Mu gihe bamwe batakambira Perezida Kagame, hari n’abandi bafana bashinja umuyobozi w’iyi kipe, Nkurunziza David, kutayiyobora neza, bavuga ko ayiyoborera kuri WhatsApp ari muri Canada aho akorera. Bati, “Ese ni gute wayoborera ikipe kuri WhatsApp wibereye muri Canada? Turarambiwe n’uyu Muyobozi.”

Hari n’abagarutse ku gihe cy’uwahoze ayobora ikipe, Mvukiyehe Juvénal, bavuga ko muri icyo gihe ikipe yari imeze neza, bagaheruka ibyishimo igihe yayiyoboraga. Bavuga ko abamurwanyije ari abari bamufitiye imyenda atabonye.

Kuri ubu, Kiyovu Sports iri ku mwanya wa nyuma wa shampiyona, ifite amanota atatu gusa n’umwenda w’ibitego 14 mu mikino umunani imaze gukina.