Abageni bagombaga gusezerana kuri uyu wa gatandatu tariki 8 nyakanga 2023, bagombaga gusezeranira kuri paruwasi gaturika ya Kibungere, iherereye muri koine Nyabihanga, mu ntara ya Mwaro mu gihugu cy’u Burundi. Aba bageni ngo bari bakererewe kubera ko ubwo bazaga kuri paruwasi imodoka yabapfanye bari munzira.

Ubwo bageraga kuri paruwasi bakererewe, padiri Paterne Ngendakumana yababwiye ko arabasezeranya ari uko batanze amafaranga ibihumbi 20 by’amarundi, gusa nyuma n’ubundi yanga kubashyingira.

La Nova Burundi dukesha iyi nkuru, bavuze ko abagize inama nkuru ya paruwasi bagerageje gusaba padiri Ngendakumana gusezeranya abo bageni ariko arabatsembera, ahubwo ahita yigendera ajya gusezeranya abandi bageni ahitwa mu Gatwe, muri komini ya Ndava iri muri iyo ntara.

Padiri Ngendakumana yirinze kugira icyo atangaza kuri ibi, gusa nubwo bimeze gutyo Yohani Habonimana uvugira abayoboye inama nkuru ya paruwasi, abicishije mu rwandiko yagaragaje ko abakirisitu bahungabanyijwe n’iyo myitwarire ya padiri Ngendakumana.