Mu gitondo cyo kuri uyu wa Kabiri, tariki ya 14 Mutarama 2024, ni bwo amakuru yacicikanye muri Espagne ko Pep n’umugore we bamaze kwemeza ko batandukana mu bwumvikane.

Aba bombi bahuye mu 1994, ubwo Pep yari akiri umukinnyi wa FC Barcelone yo muri Espagne, ndetse nyuma y’imyaka 20 bahita bemeranya ko bagomba kubana akaramata.

Kuva icyo gihe uyu muryango wabyaranye abana babiri b’abakobwa aribo Maria na Valentina, ndetse n’umuhungu witwa Marius.

Tariki ya 1 Gashyantare 2016, uyu mugabo yagizwe umutoza mushya wa Manchester City biba ngombwa ko ahita yimukana n’umuryango we bakajya gutura mu Bwongereza.

Nyuma y’imyaka itatu gusa, Cristina Serra yahise amusiga asubira mu mujyi wa Barcelona, ndetse ajyana n’umwana umwe. Kuva icyo gihe babaye ukubiri usibye rimwe na rimwe banyuzagamo bagahura, bahujwe na gahunda z’abana.

Byamaze kumenyekana ko aba bombi bamaze kumvikana gutandukana, ariko bakabigira ibanga mu rwego rwo kurinda abana babo.

Aya makuru agiye hanze mu gihe uyu mugabo w’imyaka 53 wegukanye ibikombe bitandukanye birimo n’ibya UEFA Champions League, ari mu bihe bigoye byo kugarura ikipe ye yatakaje imikino 12 muri 20 iheruka, bikaba ari ubwa mbere byari bimubayeho.

Kugeza ubu ikipe ye iri ku mwanya wa gatandatu n’amanota 34, ikarushwa 12 na Liverpool iyoboye urutonde rwa Shampiyona y’u Bwongereza.