Umuhanzi ukomoka muri Nijeriya David Adedeji Adeleke wamamaye mu muziki nka Davido yahuye na perezida Paul Kagame. Binyuze mu butumwa butandukanye bwajijwe ku mbuga nkoranyambaga za Village Urugwiro, batangaje ko uyu muhanzi umaze iminsi mu Rwanda, Davido yahuye na Perezida Kagame ariko nta byinshi kubyo baganiriye batangaje.

Davido ategerejwe gutaramira I Kigali kuri uyu wa 19 Kanama 2023, akaba yarahageze kuwa 17 Kanama 2023, aho igitaramo ategerejwemo kiza gutangira saa munani z’amanwa. Uretse we uraza kukiririmbamo, harimo na mugenzi we Tiwa Savage bakomoka mu gihugu kimwe, umunya Afurika y’Epfo Tayla ndetse na Bruce Melodie baraza kuririmba.

Iki gitaramo kiraba ari icyo gusoza iserukiramuco ‘Giants of Africa’ kiza gukurikira icyabaye kuwa 13 Kanama 2023 cyo kuritangiza cyaririmbyemo umuhanzi w’umunya Tanzaniya Diamond, Intore Masamba n’umubyinnyi Sherri Silver., cyari cyitabiriwe n’abarimo perezida Kagame.

Hashize iminsi igera kuri 2 bivugwa ko amatike yo kwinjira muri iki gitaramo kirimo aba bahanzi b’ibirangirire muri Afurika, ashize ku isoko. Muri 2014 ubwo Davido yazaga gutaramira bwa mbere mu Rwanda mu gitaramo cyo kwibohora ku nshuro ya 20, yahuriye na perezida Kagame ku Kibuga cy’indege baranasuhuzanya.