Ni icyemezo cyafashwe gikerewe kuko abo mu biro bya Perezida bari barabwiye itangazamakuru ko Minisitiri w’Intebe mushya azamenyekana tariki ya 12 Ukuboza, ariko ntibyashobotse, biba ngombwa ko gahunda yimurirwa mu gitondo cya tariki ya 13 Ukuboza ariko nabwo ntibyabaye.

Kudatangaza Minisitiri w’Intebe byatewe n’uko Perezida Macron atari yagafashe icyemezo ndakuka cy’ukwiye gusimbura Barnier, agakora neza iyi nshingano. Ni na ko yatekerezaga uko uwo yatangaza yakwakirwa na benshi.

Ahagana saa kumi n’imwe z’igitondo cyo kuri uyu wa 13 Ukuboza, Perezida Macron yahamagaye Bayrou, amumenyesha ko nta gahunda afite yo kumugira Minisitiri w’Intebe. Mu ma saa mbiri, Umukuru w’Igihugu yamwakiriye ku biro, basangira ifunguro rya mu gitondo, bisa no kumwihanganisha.

Mu kiganiro cy’isaha n’iminota 45 bagiranye, Perezida Macron yabwiye Bayrou ko ari gutekereza kugira Roland Lescure Minisitiri w’Intebe mushya. Ibyo ngo byarakaje cyane Bayrou, abwira Umukuru w’Igihugu ko niba atamuhaye iyi nshingano, byibura yayiha Bernard Cazeneuve wabaye Minisitiri w’Intebe ku bwa François Hollande.

Ikinyamakuru Le Parisien cyatangaje ko ikiganiro cyabayemo gushwana hagati ya Perezida Macron na Bayrou, Bayrou abwira Umukuru w’Igihugu ko mu gihe atamugira Minisitiri w’Intebe, azakora ikintu kibi cyane; ni ukuvuga kugumura abagize Inteko Ishinga Amategeko batavuga rumwe n’ubutegetsi.

Perezida Macron yagize ikindi gitekerezo, agaragaza ko Minisitiri w’Ingabo, Sebastien Lecornu, ari we ukwiye kuba Minisitiri w’Intebe mushya, ariko ntabwo Bayrou na byo yabyemeye.

Bayrou yafashe icyemezo cyo gusohoka mu biro bya Perezida w’u Bufaransa bwangu, yinjira mu modoka ye, ajya ahantu hatahise hamenyekana kuko ntiyasubiye mu biro bye muri Komisiyo Nkuru Ishinzwe Igenamigambi.

Umwe mu bantu bitabiriye ibi biganiro yatangaje ko Perezida Macron yagombaga kugira Lecornu Minisitiri w’Intebe, ariko ngo yageze ubwo abona ko agomba guha Bayrou iyi nshingano mu rwego rwo gusigasira ubumwe bw’Abafaransa.

Perezida Macron na Bayrou bongeye guhura mu masaa tanu z’amanywa kuri uyu wa 13 Ukuboza, bagirana ikiganiro cyari kigamije guhosha umwuka mubi wari watutumbye kuva mu gitondo. Uku guhura kwaciye amarenga ko Umukuru w’Igihugu yemeye kugira Bayrou Minisitiri w’Intebe.

Nk’uko byagaragaraga nyuma yo kongera guhura kw’aba banyapolitiki, ibiro bya Perezida Macron byatangaje ko Bayrou yagizwe Minisitiri w’Intebe mushya w’u Bufaransa, ahabwa n’inshingano yo gushyiraho abagize Guverinoma.

François Bayrou yabaye Minisitiri w’Uburezi w’u Bufaransa kuva mu 1993 kugeza mu 1997, aba Minisitiri w’Ubutabera mu 2017. Yari asanzwe ari Meya w’Umujyi wa Pau.