Ibiro bya Perezida w’u Rwanda, Paul Kagame byatangaje ko Umukuru w’Igihugu yakiriye Perezida Mamadi Doumbouya wa Guienea na Perezida Filipe Nyusi wa Mozambique ku munsi umwe.

Binyuze mu butumwa bwatambutse kuri X, Perezidansi y’u Rwanda yavuze ko Perezida Doumbouya yasuye u Rwanda ku butumire bwa mugenzi we Paul Kagame, nawe wasuye Guinea umwaka ushize. Ariko ngo ku masaha y’umugoroba kuri uyu wa Kane Perezida Kagame akakira Perezida Filipe Nyusi wa Mozambique.

Perezidansi y’u Rwanda yagize iti “Ku mugoroba washize muri Kigali, Perezida Kagame yakiriye Perezida Filipe Nyusi wa Mozambique bagirana ikiganiro cyibanze ku gukomeza kongerera ingufu imikoranire itanga umusaruro mu nzego zitandukanye.”

Perezida Nyusi yaje i Kigali nyuma y’uko ku wa Mbere w’iki cyumweru Umugaba Mukuru w’Ingabo z’igihugu cye Admiral Joaquim Mangrasse nawe yari i Kigali aho yaganiriye n’Umugaba w’Ingabo z’u Rwanda na minisitiri w’ingabo.