Fabrice Nahimana 
Perezida wa Ukraine, Volodymyr Zelensky, yemeye ku nshuro ya mbere ko ingabo ze zikorera mu karere ka Belgorod mu Burusiya gahana imbibi na Ukraine.
Kuri uyu wa Mbere ushize yagize ati: “Dukomeje gukora ibikorwa bifatika mu turere duhana imbibi ku butaka bw’abanzi, kandi ibyo ni ukuri rwose, intambara igomba gusubira aho yaturutse.”
Amagambo ye yerekeje no ku karere ka Kursk mu Burusiya, aho Ukraine ikomeje kugira agace gato nyuma y’igitero gikomeye yahagabye umwaka ushize nk’uko iyi nkuru dukesha Euronews ivuga. Kuva icyo gihe Moscou yisubije igice kinini cy’aho hantu.
Zelensky yavuze ko “intego nyamukuru” ari ukurinda uturere two ku mupaka twa Sumy na Kharkiv muri Ukraine, no “koroshya igitutu” ku bindi bice by’umurongo w’urugamba, cyane cyane mu Karere ka Donetsk mu burasirazuba.
Mu kwezi gushize Ingabo z’u Burusiya zavuze ko Ukraine yagerageje kwambuka mu karere ka Belgorod, ariko zivuga ko ibyo bitero byasubijwe inyuma.
Perezida w’u Burusiya, Vladimir Putin, yagabye igitero simusiga muri Ukraine mu 2022, aho kuri ubu Moscou igenzura hafi 20% by’ubutaka bwa Ukraine.
U Burusiya buhakana ibirego bya Amerika n’u Burayi bivuga ko iseta ibirenge ku cyifuzo cya Perezida wa Leta Zunze Ubumwe za Amerika, Donald Trump, cyo guhagarika intambara.
