Umunyamakuru, umuhanzi akaba n’umuvangamiziki (Dj) PhilPeter, yatunguwe cyane ubwo yamenyaga ko habaho uburyo umuntu ashobora kuguza amafaranga kuri telefone, ubu bwitwa MoKash, avuga ko ari ibintu bishya mu matwi ye. Ibi byabereye mu kiganiro The Choice Live kiba buri cyumweru ku ISIBO TV.

MoKash ni uburyo bwa MTN Mobile Money aho umuntu usanzwe akoresha iyi serivisi ashobora gusaba kugurizwa amafaranga umubare runaka, aho umuntu bagenda bamuguriza umubare w’amafaranga bitewe n’ayo abitsaho cyangwa se uko yishyura iyo bamugurije.

Ati “Hari uburyo waguza amafaranga kuri telefone atari kuri Banki?”Niko yabajije. Ubwo uyu munyamakuru PhilPeter ndetse na Babou bakorana iki kiganiro bari bageze mu mwanya wo kwakira abaririmbyi bari bakiriye muri studio, mu gutera urwenya bavuga ku muhanzi bagiye kwakira bamubaza niba afite amafaranga, ubwo Babou yavugaga ku gufata inguzanyo kuri telefone, PhilPeter yatunguwe cyane abaza Babou niba habaho ubwo buryo bwo kuguza amafaranga kuri telefone.

Babou amusubije ko ubwo buryo bubaho, PhilPeter yavuze ko urubyiruko rw’ubu rufite ibibazo, ati “Urubyiruko rw’ubu rurasumbirijwe kabisa”. Ni ibintu byamutunguye cyane akomeza abaza inzira bicamo kugira ngo umuntu abe yahabwa iyo nguzanyo yo kuri telefone.

Ati “Nonese umuntu hari uburyo ashyiraho icyangombwa cy’ubutaka?” Nk’uburyo bwo kugaragaza ko ari ubwa mbere iyi nkuru y’iyi nguzanyo imugeze mu matwi ye. Gusa nta wamenya niba koko PhilPeter yateraga urwenya cyangwa se akaba yijijishaga.

Hashize iminsi shene za YouTube z’uyu munyamakuru PhilPeter, The Choice Live ndetse na PhilPeter 250 zivuye ku muyoboro wa YouTube, kuburyo amashusho yose yari yarashyizweho kuri ubu utapfa kuyabona.