Polisi y’Igihugu, Ishami ryo mu muhanda, yatangaje ko hagiye kuzanwa Camera zizifashishwa mu gucunga umutekano, aho zigiye gushyirwa hirya no hino mu gihugu ndetse bikaba byitezwe ko zizatwara miliyari 2,9 Frw.

Kuva mu 2013, mu Mujyi wa Kigali hatangiye gushyirwa Camera zifashishwa mu gucunga umutekano, aho zishyirwa ahantu hatandukanye ku mihanda n’ahahurira abantu benshi ku buryo zikurikirana amakuru y’ibiba umunota ku wundi.

Polisi isobanura ko ziyifasha mu gutahura ibyaha biba ntibibone. Zitahura kandi ibyabaga mu masaha y’ijoro ntibimenyekane. Izi Camera zigenzurirwa ku cyicaro gikuru cya Polisi ku Kacyiru, ndetse zagize uruhare mu gukumira ibyaha byakundaga kubera mu mihanda nk’ubujura n’ibindi.

Mu ngengo y’imari ya 2024/25, Leta yiyemeje kongera umubare w’izi camera, aho hazagurwa izindi, bigatwara miliyari 2,9 Frw. Izi Camera zije nyuma y’izitwa Red Light Camera ziba muri feux rouge.

Izi kandi zikiyongera ku zindi zisanzwe zikumira ibyaha n’amakosa yo mu muhanda. Zirimo iyitwa Speed Enforcement Camera, izwi nka Sophia. Zunganirwa n’izindi zitwa Trailer zishobora kwimurwa. Hari n’izindi nto zishobora kwimurwa n’Umupolisi (Mobile Camera).

Mu 2020 Guverinoma y’u Rwanda yasinyanye amasezerano ya Miliyoni z’amadorali n’ikigo cyitwa Eastern Ventures cyo muri Leta Zunze ubumwe z’Abarabu, agamije gufasha kurushaho guteza imbere umutekano wo mu muhanda mu Rwanda.