Abasore babiri bo mu Karere ka Gisagara mu Murenge wa Save, barashwe n’Umupolisi barapfa nyuma yo kubavumbura aho bari bihishe, Polisi ivuga ko bari batorotse kasho bamaze gufatwa kubera icyaba bari bakurikiranyweho.

Bariya basore ngo bashakishwaga nyuma yo gusambanya ku ngufu no kwica urubozo Mukandekezi Clementine; aho bamusanze iwe bakanamutwara ibyo yari afite.

Polisi ivuga ko bashakishijwe barafatwa, ariko baza gupfumura kasho barimo baratoroka, ngo umupolisi wabaguyeho “bamurwanyije arabarasa.”

Umuvugizi wa Polisi y’u Rwanda, ACP Boniface Rutikanga, yabwiye IGIHE dukesha iyi nkuru ko bariya basore barashwe ari uwitwa Nshimiyimana Eric w’imyaka 22, n’uwitwa Nshimiyimana Innocent w’imyaka 20.

Abo basore bishe Mukandekezi w’imyaka 28 y’amavuko wo mu Karere ka Gisagara mu Murenge wa Save, mu Kagari ka Munazi, nyuma y’uko bamusanze mu rugo rwe aho yibanaga, bagatobora inzu, bakamusambanya barangiza bakamwica ndetse bagatwara na bimwe mu byo yari atunze.

Umuvugizi wa Polisi, ACP Boniface Rutikanga yagize ati “Nyuma y’uko bigaragaye ko batorotse, twatangiye kubashakisha. Mu masaha ya Saa Sita n’igice z’amanywa (10h30 a.m), nibwo babiri muri bo umupolisi yabaguye gitumo aho bari bihishe, baramurwanya, arabarasa.”

Yavuze ko mugenzi wabo wa gatatu, witwa Gabiro Jean de Dieu yafashwe.

Umuvugizi wa Polisi yavuze ko hari gukorwa iperereza ryimbitse kugira ngo hamenyekane uburyo aba bakekwaho ubugizi bwa nabi babashije gucukura kasho bagatoroka, n’icyihishe inyuma y’ubugome bakoreye Mukandekezi.