Imirwano mu Burasirazuba bwa RDC imaze igihe ariko yakajije umurego ku wa 23 Mutarama 2025 ubwo umutwe wa M23 wigaruriraga imijyi nka Sake, bihumira ku mirari wigaruriye na Goma.

Abakuru b’ibihugu bigize EAC, bahise bemeranya ko bose bazitabira Inama idasanzwe yiga kuri iki kibazo ariko ubwo yateranaga hifashishijwe ikoranabuhanga kuri uyu wa 29 Mutarama 2025, Perezida Felix Tshisekedi wa RDC yahisemo kwiheza nubwo ingingo yaganirwagaho irebana n’umutekano w’igihugu cye.

Imyanzuro yashyizwe ahagaragara nyuma y’iyi nama igaragaza ko abakuru b’ibihugu batewe impungenge n’uburyo ibibazo by’umutekano muke bigenda birushaho gukaza umurego muri RDC, bigaragarira ku myigaragambyo n’ibitero byagiye bigabwa kuri ambasade z’ibihugu bitandukanye birimo n’ibyo mu muryango wa EAC, gutwika, gusahura ndetse n’urundi rugomo.

Basabye impande zose ziri mu ntambara guhagarika imirwano hagamijwe korohereza abatanga ubutabazi ku bagizweho ingaruka n’intambara.

Imyanzuro igira iti “Inama yasabye ko habaho gukemura ibibazo mu mahoro, kandi isaba Guverinoma ya Repubulika Iharanira Demokarasi ya Congo kuganira n’impande zose harimo na M23 n’indi mitwe yitwaje intwaro irwanira uburenganzira bwabo butubahirizwa.”

Ku rundi ruhande muri RDC, igihe inama yabaga Perezida Tshisekedi yabwiraga Abanye-Congo ko bazakomeza intambara, ndetse ahamya ko yamaze gutegeka ibigo bya Leta kwizirika umukanda ngo haboneke amafaranga yo gutera inkunga abasirikare bari kurwana.

Abakuru b’ibihugu bya EAC kandi bagaragaje ko Umuryango w’Ubukungu n’Iterambere ry’Ibihugu bya Afurika y’Amajyepfo (SADC) ukwiriye kuzaganira na EAC ku buryo bwo gutwara ibintu muri Congo.

Iti “Kuko SADC yagize uruhare mu bibera mu Burasirazuba bwa RDC, inama yemeje ko hazaba inama ihuza EAC na SADC hagafatwa umwanzuro ku kigomba gukorwa mu bihe biri imbere.”

Perezida Ruto yahawe inshingano yo gutegura no kuvugana n’abayobora SADC ku buryo mu minsi mike hakorwa inama ihuza impande zombi.