Fabos Fali 
Ubuyobozi bw’intara ya Kivu y’Amajyaruguru muri Repubulika Iharanira Demokarasi ya Congo bwatangaje ko mu myaka itatu ishize, umutwe witwaje intwaro wa M23 nta gace na kamwe wafashe.
Aya makuru yatangajwe na Guverineri wungirije w’iyi ntara, Komiseri Romuald Ekuka, mu kiganiro yagiranye n’abanyamakuru kuri uyu wa 5 Mutarama 2025.
Komiseri Ekuka yagize ati “Mu myaka itatu kuva ibihe bidasanzwe byashyirwaho, M23 ntiyavuye aho iri. Kandi uyu munsi tumaze imyaka itatu turi mu ntambara.”
Abarwanyi ba M23 bafashe intwaro mu Ugushyingo 2021 nyuma y’imyaka umunani bahagaritse intambara. Muri Kamena 2022 bafashe umujyi wa Bunagana n’ibindi bice byo muri teritwari ya Rutshuru.
Muri uwo mwaka, M23 yafashe gurupoma ya Kibumba muri teritwari ya Nyiragongo n’ibindi bice bihana imbibi, yinjira no muri teritwari ya Masisi.
Ibikorwa bya M23 byo kwagura ibirindiro byagenze gake mu mwaka wa 2023 kuko ibice yagenzuraga yabishyikirije ingabo zari mu butumwa bw’amahoro bw’umuryango wa Afurika y’Iburasirazuba.
Ubwo ingabo z’uyu muryango zari zimaze kuva muri Kivu y’Amajyaruguru, ingabo za RDC zagabye ibitero kuri M23, mu kwirwanaho yisubiza bya bice, ifata n’ibindi. Byageze mu ntangiriro za 2024 M23 yasatiriye umujyi wa Goma na Sake.
Mu 2024 kandi, M23 yinjiye muri teritwari ya Walikale na Lubero, ifata ibice byinshi byaho. Bisobanuye ko mu myaka itatu Komiseri Ekuka avuga, uyu mutwe ugenzura ibice byo muri teritwari eshanu zose zigize Kivu y’Amajyaruguru.
Fabos Fali 
