Urwego rw’Igihugu rw’Ubugenzacyaha (RIB) rwasohoye itangazo rimenyesha ko rwataye muri yombi Umuyobozi w’Ishami ry’Imiyoborere mu Ntara y’Amajyepfo, Kabera Vedaste ukurikiranyweho icyaha cyo guha ruswa umugenzacyaha wakurikiranaga dosiye aregwamo n’umugore we ku byaha byo kumuhoza ku nkeke no kumuhohotera.

Amakuru UMUSEKE dukesha iyi nkuru wamenye avuga ko Kabera Védaste yahamagajwe n’Umugenzacyaha ukorera kuri Sitasiyo ya RIB I Nyamabuye ejo mu gitondo cyo kuri iki Cyumweru taliki ya 21 Mutarama 2024 amubaza kuri ibi byaha ashinjwa aramureka arataha.

RIB ibinyujije kuri X yatangaje ko yamutaye muri yombi nyuma y’uko ageze iwe mu rugo akoherereza uyu Mugenzacyaha amafaranga 10.000 Frw ayanyujije kuri telefone ye igendanwa ngo ayategeshe moto bahurire kuri Hoteli kugira ngo baganire kuri iyi dosiye.

Bivugwa ko ubwo uyu Mugenzacyaha yamaraga Kubona ayo mafaranga yahise abimenyesha inzogo bakorana maze zijya gufata Kabera zimuzana kuri Sitasiyo yaho bakorera i Nyamabuye.