Kuri uyu wa 7 Ukuboza 2023, nk’uko bigaragara muri raporo ‘Rwanda Bribery Index 2023’ yashyizwe hanze n’umuryango Transparency International Rwanda, bigaragara ko Urwego rw’Igihugu rw’Ubugenzacyaha,RIB, rwaje ku isonga mu zifite abakozi bariye ruswa nyinshi mu mwaka wa 2023.

Iyi raporo igaragaza ko impuzandengo ya ruswa abakozi ba RIB bakiriye muri uyu mwaka ari amafaranga y’u Rwanda 282,968. Muri rusange bigaragara ko abangana na  85.3% batanze ruswa ya 3,860,000 Frw kugira ngo abantu babo bafunzwe bafungurwe muri za kasho barimo.

Ku mwanya wa Kabiri haje Ubushinjacyaha, iyi raporo igaragaza ko impuzandengo ya ruswa abakozi babwo bahawe muri uyu mwaka ari 200,000Frw. Uyu Muryango ushinzwe kurwanya ruswa n’akarengane wagize uti “Umuntu umwe yahaye umushinjacyaha 200,000 Frw kugira ngo ataregera dosiye Urukiko.”

Ku mwanya wa gatatu haza Urwego rw’ubucamanza aha ho raporo igaragaza ko impuzandengo ya ruswa abakozi barwo bahawe ari 153,000 Frw. Uyu muryango mu gusobanura wagize uti “Abantu 6 bahaye abacamanza 920,000 Frw arimo 570,000 Frw yo kwegeza imbere itariki y’iburanisha.”

Nyuma y’umwanya wa gatatu hakurikiyeho Urwego rushinzwe ubuziranenge bw’ibicuruzwa, amabanki, inzego z’ibanze, ikigo cy’imisoro n’amahoro, ikigo WASAC gishinzwe gukwirakwiza amazi, ishami rya Polisi rishinzwe umutekano wo mu muhanda, izi zo ni kumpuzandengo ya ruswa iri hagati ya 100.000 na 42,945 Frw.

TI-Rwanda yanzura ko ruswa yatanzwe muri uyu mwaka wa 2023 ari 22,814,500 Frw ndetse ko habayeho kugabanuka ugereranyije n’umwaka ushize, kuko ho hari hatanzwe 38,352,563 Frw.