Ku wa Mbere tariki 15 Mutarama 2024, ni bwo umunyeshuri witwa Niyomufasha Marie w’imyaka 16 y’amavuko wiga mu mwaka wa kabiri, ku kigo cy’amashuri ya G.S Binaga yafashwe atitira akubita umunwa ku ntebe, ajyanwa kwa muganga yacitse intege ahita yitaba Imana.

Iki kigo giherereye mu Murenge wa Mbogo Akarere ka Rulindo, ubuyobozi bwacyo busobanura ko Niyomufasha yafashwe n’ubwo burwayi bw’amayobera ahagana saa saba z’amanywa, maze yihutanwa kuri Poste de Sante na bagenzi be, ariko bamugezayo ari muri koma.

Umuyobozi w’iki kigo, Murebwayire Alphonsine yavuze ko akigezwa kuri Poste de Sante yahise yitaba Imana, kandi ko uwo munyeshuri ari ubwa mbere yari arwariye ku ishuri. Kuri ubu umurambo wa Nyakwigendera uri mu Bitaro bya Kacyiru ngo ukorerwe isuzuma hamenyekane icyamwishe.