Kuri uyu wa 02 Mata 2024, ni bwo Inama Njyanama y’Akarere ka Rusizi yemeje ubwegure bwa Ndagijimana Louis Munyemanzi wari Visi-Meya wungirije ushinzwe iterambere ry’ubukungu muri aka Karere, ni nyuma y’iminsi mike agiranye amakimbirane na Meya w’aka Karere, Dr Kibiriga Anicet.

Uweguye ntabwo ari Ndagijimana gusa kuko abandi beguye barimo Kwizera Jovanni wari Visi-Perezida wa Njyanama cyo kimwe na Mukarugwiza Josephine na Gakwaya Jean Damascene Habiyakarewari bari abajyanama b’Akarere.

Visi-Meya Ndagijimana yeguye nyuma y’iminsi bivuzwe ko aherutse kurwanira na Meya w’aka Karere, Dr Kibiriga Anicet mu kabari. Guhera mu minsi yashize kandi byatangiye kuvugwa ko abayobozi bayobora Akarere ka Rusizi bafitanye amakimbirane ndetse ahanini ngo aturuka ku kuba Dr Kibiriga uyobora aka Karere asanzwe aba mu Mujyi wa Kigali ngo abenshi ntibamwiyumvemo.

Ubu bwumvikane buke kandi bwatumye mu kwezi gushize Uwumukiza Béatrice wari umuyobozi w’Inama Njyanama y’Akarere yegura ku mirimo, nyuma y’iminsi mike ashinje Meya Kibiriga ibyaha birimo gupfobya Jenoside yakorewe Abatutsi no gushengura abayirokotse mu 1994.