Fabrice Nahimana Ku mugoroba wo kuri uyu wa Gatanu tariki ya 21 Ugushyingo, Ingabo za Repubulika Iharanira Demokarasi ya Congo zagabye ibitero mu gace ka Mahanga ho muri Teritwari ya Masisi zikoresheje indege y’intambara.
Iyi ndege yo mu bwoko bwa Sukhoi-25 yarashe muri kariya gace, nyuma y’uko mu masaha yo ku manywa yari harashe inshuro ebyiri mu gace ka Mikenke, mu ntara ya Kivu y’Amajyepfo.
Agace ka Mahanga kuri uyu wa Gatanu kiriwemo imirwano ikaze hagati y’inyeshyamba zo mu mutwe wa AFC/M23 n’ihuriro ry’ingabo za Leta ya Repubulika Iharanira Demokarasi ya Congo.
Ni imirwano ikomeje kubera mu bice bitandukanye bya RDC, mu gihe Umuyobozi w’Ikirenga wa Qatar, Sheikh Tamim bin Hamad bin Khalifa Al Thani ari mu ruzinduko muri iki gihugu.
Qatar ni yo yakiriye ibiganiro bimaze amezi umunani bihuza Kinshasa na AFC/M23, ndetse mu byo impande zombi zumvikaniye i Doha harimo gutanga agahenge kugeza ubu katarabasha kuboneka.
