Amakuru aravuga ko Eric Ndagijimana uzwi nka X-Dealer yatawe muri yombi kuwa 5 Ukwakira 2023 akurikiranweho icyaha cyo kwiba Telefone ya The Ben wari uri gukorera ibitaramo I Burundi. Uyu Eric Ndagijimana yagiye mu Burundi mu gisaragara cya Bujumbura agiye kwiba Telefone ya The Ben.

Inyarwanda dukesha iyi nkuru iravuga ko amakuru yizewe yahawe ari uko uwahaye ikiraka X-Dealer kwiba telefone ya The Ben yamwemereye igihembo cya miliyoni 3frw. Icyari kigambiriwe ni ugukuramo amasezerano yari muri iyo telefone n’amwe mu mashusho yari arimo.

Uwatanze amakuru yavuze ko X-Dealer yacunze The Ben avuye aho yari yicaye agiye gusuhuza abafana, ahita ajya kwicara ku meza yari yicayeho The Ben ari naho iriya telefone yabuze. Igitaramo kikirangira nibwo X-Dealer yavuye aho ataha aho yari yaraye bucya agaruka I Kigali. Uwatanze amakuru aremeza neza ko telefone ya The Ben yatahanwe I Kigali na X-Dealer.

Kuwa 2 Ukwakira 2023 byagaragaye ko telefone ya The Ben iri I Nyamirambo ahitwa kwa Mutwe. Uwatanze amakuru yavuze ko mu ibazwa, Dealer yemeye ko yicaye ku meza ya The Ben mu gitaramo ubwo The Ben yaririmbanaga n’abafana. Ikindi kandi yemeye ko yatashye atitabiriye igitaramo nyirizina cyabaye kuwa 1 Ukwakira 2023 kuri Messes des Officiers.

Dealer ngo yavuze ko impamvu yatashye kare ari uko yumvaga yarambiwe akeneye kwigarukira mu Rwanda. Uwatanze amakuru aremeza ko iyi telefone ye The Ben iri mu bwoko bwa iPhone ijimije ari nayo mpamvu inzego zishinzwe iperereza zitari kubona ahantu iri kuburyo Dealer akomeza kubazwa kuri ubu bujura.

Dealer afungiye kuri sitasiyo ya RIB ya Kimihurura mu gihe iperereza rigikomeje. Uwatanze amakuru kandi aremeza ko yiboneye Dealer yicara ku meza ya The Ben yari yicayeho mbere yo kujya kuramukanya n’abafana. Ntabwo urwego rw’Ubugenzacyaha ruraboneka ngo rugire icyo rubivugaho.