Ku mugoroba wo kuwa 14 Ukwakira 2023 ubwo Mugisha Benjamin uzwi nka The Ben yari umutumirwa wa Radiyo Rwanda, yabajijwe ku mikorere ye ndetse n’indirimbo ebyiri ategura gushyira hanze. Hari nyuma y’uko amaze gutangariza abafana be ko hari indirimbo ebyiri afite ashaka gushyira hanze, imwe y’urukundo n’indi ihimbaza Imana ababaza iyo bahitamo ko asohora mbere.

Ubwo yabazwaga kuri izo ndirimbo agiye gushyira hanze ndetse akabazwa niba noneho abafana be bagiye kwitega ko agiye gushyira hanze indirimbo nyinshi icyarimwe, The Ben yasubije avuga ko buri muhanzi agira umuvuduko akoreraho utandukanye n’abandi bityo ko na we agira uburyo bwe bwihariye mu bikorwa bye.

Yagize ati “Ngira umuvuduko wanjye ntabwo umeze nk’uw’abandi, njye nkunda gukora ibintu uko mbyumva kurusha uko umuntu yambwira, mu yandi magambo njye nkunda gukora ikintu gifite ireme cyane kurusha ubwinshi bw’ibintu (Quality vs Quantity.”

Yakomeje avuga ko aho kugira ngo mu mwaka ashyire hanze ibihangano birenga 50 bitameze neza agamije kugira umubare mwinshi, ahubwo yakora indirimbo ebyiri cyangwa eshatu zifite umwimerere n’umwihariko.

Ni nyuma y’uko The Ben yari aherutse gushyira hanze indirimbo kuwa 4 Mutarama 2022, ‘why’ yakoranye na Diamond ndetse ahitamo ko ishyirwa kuri shene ya YouTube ya Diamond. Mu gihe abantu batandukanye bagiye bashinja The Ben na Meddy ubunebwe mu muziki kandi bafite abakunzi benshi, The Ben agaruka ku gukorana n’abandi bantu yavuze ko muri iyi 2023 bidashoboka, ariko mu mwaka utaha hari indirimbo ateganya kuzakorana na bagenzi be.