Gloire AKIMANA 
Umusore witwa Ngendahayo Jeremie ukinira May Stars yahawe igihano cyo gukurwa muri Tour du Rwanda, acibwa amande y’amafaranga angana n’ibihumbi 290 Frw ndetse akurwamo amanota 50 k’urutonde rw’umukino w’amagare ku Isi.
Amakuru avuga ko uyu musore yahanwe kubera ikosa yakoze ku munsi w’ejo ubwo bahagurukaga i Karongi berekeza i Rubavu mu gace ka kane k’iri siganwa, nyuma yo gukora amakosa akisunga imodoka ayifataho ngo imufashe kuruhuka kandi biba bitemewe muri iri siganwa.
Ubuyobozi bwa tekinike bwa Tour du Rwanda kandi bwatangaje ko mu itangwa ry’ibihembo nyuma ya Etape ya Karongi -Rubavu (93Km) habayemo kwibeshya hagahembwa Habteab Yohannes (BikeAid) nk’uwakoze Sprint neza mu gihe bagombaga guhemba Umunyarwanda, Munyaneza Didier bityo akaba agomba gusubizwa igihembo byihutirwa.
Kuri uyu wa Kane harakinwa agace gatanu aho abasiganwa barahaguruka i Musanze bajya mu Kinigi, kuri kilometero 13 zizamuka ndetse buri muntu arasiganwa ku giti cye.
