Nyuma y’igihe gito gishize u Burundi bufunze imipaka yose ibuhuza n’u Rwanda, Umuvugizi wungirije wa Guverinoma y’u Rwanda, Alain Mukuralinda yatangaje ko mu gihe u Burundi bwakenera ko ibiganiro bikomeza, u Rwanda rwiteguye kubikora kuko ruhora rushaka ko ibibazo byarwo n’ibindi bihugu bikemuka binyuze mu biganiro.

Ibi bitangajwe nyuma y’igihe gito u Burundi bufunze imipaka yose ihuza iki gihugu n’u Rwanda kubera kurushinja gufasha umutwe wa RED-Tabara urwanya ubutegetsi bw’iki gihugu. Umwuka mubi hagati y’ibi bihugu watangiye mu mwaka wa 2015 u Burundi buvuga ko abashakaga guhirika ubutegetsi bw’uwari Perezida Pierre Nkurunziza bahungiye mu Rwanda.

Kubera iki kibazo byageze aho imipaka ifungwa, ugeze aho urafungurwa, bikomeza kuganirwaho ariko n’ubundi imipaka yongera gufungwa, u Burundi bwashinje u Rwanda gucumbikira abarwanyi b’uyu mutwe, buvuga ko ari ho utera uturuka. Ni mu gihe bwari bwaramaze kwemeza ko RED Tabara ikorera muri Repubulika Iharanira Demokarasi ya Congo, ko ari ho itera ituruka.

Mu kiganiro ni itangazamuku Umuvugizi wungirije wa Guverinoma y’u Rwanda, Alain Mukuralinda yavuze ko kuvuga ko imipaka yafunzwe kubera RED-Tabara yaturutse mu Rwanda atari byo kuko hatigezwe hanagaragazwa aho binjiriye.

Yagize ati “Niba batarabashije kuvuga aho winjiriye [kandi barahazi], ni uko bazi neza ko utinjiriye mu Rwanda. Iyo baba barinjiriye mu Rwanda, ntabwo ayo makuru bari kuyahisha kuko ni ho ruzingiye. Bari kuvuga ngo ‘tariki runaka, saa ngahe binjiriye i Nemba, ku Kanyaru cyangwa Kibira.”

Akomeza agira ati “Kuki se niba ayo makuru wiyemeje kuyashyira ku karubanda, wasiga aho binjiriye. Urashaka se kuvuga ko bafite ibiro mu Rwanda bakitoza, bakivuriza, bajya gutera bakinjirira muri Congo, na byo niba ari ibyo bivuge. Ari na ko byagenze niho rwaba ruzingiye, ni ikimenyetso gifatika byanagora u Rwanda kubisobanura, ndemeza ko icyo gihe no kubihakana bitashoboka.”

Mukuralinda yavuze ko nubwo abantu basesengura ikibazo cyo gufunga imipaka hagati y’ibihugu byombi mu buryo butandukanye, burya ibihugu byombi birahahombera. Ati “ntabwo wavuga ngo uyu ni we uhomba kurusha undi. Kuko abaturage baturiye imipaka impande zose barazikenera, kuko hari igihe usanga babaho nk’abadafite imipaka.”

Imipaka yose ihuza u Rwanda n’u Burundi yafunzwe ku wa 11 Mutarama 2024, nyuma y’amagambo yatangajwe na Perezida w’u Burundi Ndayishimiye Evariste ashinja u Rwanda guha ubufasha umutwe wa RED-Tabara wari umaze kugaba ibitero bigahitana benshi kandi usanzwe urwanya ubutegetsi bw’iki gihugu.